વલસાડ જિલ્લાના અંતરિયાળ વિસ્તારમાં શિક્ષણનું વટવૃક્ષ બની શૈક્ષણિક સિદ્ધિઓમાં અગ્રેસર સરકારી વિનયન અને વિજ્ઞાન કોલેજ, કપરાડા માટે ગૌરવની ક્ષણ સર્જાઈ છે. કોલેજના તૃતીય વર્ષ **બી.એ. (અંગ્રેજી મુખ્ય વિષય)**ની પ્રતિભાશાળી વિદ્યાર્થીની કુમારી પૂનમ રાજપુરોહિતે સમગ્ર યુનિવર્સિટીમાં અંગ્રેજી વિષયમાં પ્રથમ સ્થાન મેળવી ગોલ્ડ મેડલ પ્રાપ્ત કરી કોલેજનું નામ ગૌરવભેર રોશન કર્યું છે.

આ ઉપરાંત, કોલેજ ખાતે તેમની “Student of the Year – 2025-26” તરીકે પણ પસંદગી કરવામાં આવી છે. તેમની આ બમણી સિદ્ધિ સમગ્ર કોલેજ પરિવાર માટે વિશેષ ગૌરવની બાબત બની છે.

પૂનમ રાજપુરોહિતની આ સફળતા તેમની મહેનત, લગન, શિસ્ત અને શૈક્ષણિક પ્રતિભાનું ઉત્તમ પરિણામ છે. તેમની આ સિદ્ધિ અન્ય વિદ્યાર્થીઓ માટે પણ પ્રેરણારૂપ બની છે.

અન્ય બે વિદ્યાર્થીનીઓએ પણ યુનિવર્સિટી કક્ષાએ પ્રથમ સ્થાન મેળવ્યું

કોલેજ માટે વધુ એક ગૌરવની બાબત એ છે કે કુમારી પૂનમ રાજપુરોહિતે Minor-VI : Sanskrit – VI : Sanskrit Gadya Sahitya (Katha) વિષયમાં 44.00/50.00 ગુણ સાથે સમગ્ર યુનિવર્સિટી કક્ષાએ પ્રથમ ક્રમ પ્રાપ્ત કર્યો છે.

તે જ રીતે, કોલેજની અન્ય તેજસ્વી વિદ્યાર્થીની કુમારી અવતાર અનિતાએ Minor-VI : Sociology – VI : Sociology of Woman વિષયમાં 44.00/50.00 ગુણ સાથે સમગ્ર યુનિવર્સિટી કક્ષાએ પ્રથમ ક્રમ હાંસલ કર્યો છે.

એક જ પરીક્ષામાં કોલેજની વિદ્યાર્થીનીઓ દ્વારા વિવિધ વિષયોમાં યુનિવર્સિટી કક્ષાએ પ્રથમ સ્થાન પ્રાપ્ત કરવું એ સમગ્ર કોલેજ પરિવાર માટે આનંદ અને ગૌરવની બાબત છે.

આ સિદ્ધિઓ વિદ્યાર્થીઓની પ્રતિભા સાથે સાથે કોલેજના ગુણવત્તાયુક્ત શિક્ષણ, સતત માર્ગદર્શન અને શૈક્ષણિક વાતાવરણનું પણ પ્રતિબિંબ છે.

આ પ્રસંગે કોલેજના આચાર્યશ્રી મનોજકુમાર પી. પટેલ, અધ્યાપકગણ તથા સમગ્ર કોલેજ પરિવારે કુમારી પૂનમ રાજપુરોહિત અને કુમારી અવતાર અનિતાને હાર્દિક અભિનંદન પાઠવી તેમના ઉજ્જવળ ભવિષ્ય માટે શુભેચ્છાઓ પાઠવી છે.